मासिक निवृत्तीवेतन ई-कुबेर प्रणालीव्दारे होणार जमा
पालघर दि. ०८ : निवृत्तीवेतन व कुटुंबनिवृत्तीवेतन धारक यांचे निवृत्तीवेतन व इतर लाभ हे कोषागारामार्फत रिझर्व बँकेतून थेट त्यांच्या खात्यात जमा करणे करिता’ ई-कुबेर प्रणाली ‘विकसित करण्यात आलेली असुन त्याव्दारे यापुढे निवृत्तीवेतन व निवृत्तिवेतनविषयक लाभ मिळणार आहेत.
सद्यस्थितीत पालघर कोषागार कार्यालय अधिनस्त निवृत्तीवेतनधारक / कुटुंब निवृत्तिवेतनधारक यांना सी.एम. पी. प्रणालीद्वारे निवृत्तीवेतन प्रदान करण्यात येत असून यापुढील कामकाज ई-कुबेर प्रणालीद्वारे करण्यात येणार आहे . ई-कुबेर या प्रणालीची अंमलबजावणी करतेवेळी असे निदर्शनास आले आहे की, निवृत्तीवेतनधारक व कुटुंब निवृत्तीवेतनधारक यांनी निवृत्तीवेतन सुरु करतेवेळी पालघर जिल्हयातील अधिकृत बँकेत खाते उघडले व नंतर सदर
बँक खाते कोषागार कार्यालयाच्या अपरोक्ष इतर जिल्हयातील इतर बँकेत / शाखेत वर्ग करुन घेतलेले आहेत. संबंधीत
खाते इतर बँकेत वर्ग केल्यामुळे बँक आय एफ.एस.सी. कोड मध्ये बदल झालेला आहे. ई-कुबेर प्रणालीत बँक शाखा आय. एफ. एस. सी. कोड तसेच संबंधितांची नावे अचुक असणे बंधनकारक असल्यामुळे जिल्हा कोषागार अधिकारी,
पालघर यांनी आवाहन केले आहे की, निवृत्तीवेतनधारक / कुटुंब निवृत्तीवेतनधारक यांनी जिल्हयाबाहेर खाते वर्ग केले
असल्यास ते खाते पालघर जिल्हयातील मुळ शाखेत वर्ग करावे व जिल्ह्यांतर्गत शाखा बदल केला असल्यास पुर्वीच्या
बँकचे ना-देय प्रमाणपत्रासह नवीन बँक शाखेचे पासबूक प्रथम पृष्ठ छायांकित प्रत पालघर कोषागार कार्यालयास सादर
करावी जेणेकरुन नियमित मासिक निवृत्तीवेतन मिळण्यास समस्या निर्माण होणार नाहीत. असे न केल्यास व
निवृत्तीवेतन जमा होण्यास समस्या निर्माण झाल्यास त्याची सर्वस्वी जबाबदारी संबंधीत निवृत्तीवेतनधारक / कुटुंब निवृत्तीवेतनधारक यांची राहील.